१
गठबन्धन री सरकार
पांगळै नै
साथै राखण रौ अळेपौ
जे नीं राखै
तौ ई स्यापौ।
२
मिनखपणौ
झूठ री नाव माथै
स्वार
मिनख जद
साच सूं परै टिप जावै
तौ मिनखपणौ
कांई लारै रैय जावै।
३
सत्तापख
पीयेड़ा
कांई कूंतंनै बोलै ?
घणकरा`क तौ
नाळियौ
मूतंनै खोलै।
४
डतरीउतार
खावै अर सोवै
सैंग सूं बेसी
पंण कांम मांय
लारै रैसी।
५
गरीब री मनवार
माचली रौ टूट्योड़ौ
बांण
बिठावै पंण
सवै कोनी
खींचातांण।
६
सीरवाळी
बूढै री
ब्यावली
ठाह नीं
कद तांईं रैयसी
कद भाज जावैली।
७
कविता
ज्यूं जपायत रै
पीड़ उठै
अर जाम्यां ई
पैंडौ छूटै।
८
कवि
जकै रै घरां
बटाऊ आंवता डरै
चाय-पाणी पछै
पैलां कविता करै।
९
सम्पादक
ठाडै रौ डोकौ
पाड़ै
डांग नै जकौ।
No comments:
Post a Comment